nagkinnitata't apagdarikmat itay la a mumalem
ta gayam nagabayta a naguray iti lugan
iti abay ti kalsada
agpa-airportak, diak ammo no sadinno kenka
ngem gapu ta dagusna la nga imbayakabak
dinnillawta laengen ti maysa ken maysa
a, wen, nagabayta a pudno
a dita man la narikna no asinno kadata tay immabay
agasem a kanito ti inna impaturay
nga inwalin, nga inwagat, a rinabsut kaniak
kanito koma man la a naipapasko
dagitay matak kenka--iti libnosmo ken kinalasbang
naggiddanta pay a nagtaray, di kadi?
naglinong iti sirok ti kayo, abay met la’t kalsada
kayo tay salamagi, malagipmo pay kadi?
kayo nga tay ingget irut a kari inna sinaksi
ala, naglabasen dagidi a kinasam-it,
dagidi nga aglaplapusanan a rag-o ni ayat--
kasla di mamengga nga essem ken karayo
nailangitan a rikna a linemmes met ti panawen
tiempo a nangitalaw kenka, di naigawid
pagam-ammoan la ta linnaawka lattan
a nagpukaw iti tangatang, pagam-ammoan met
a timpuarka lattan iti let-ang iti kaawan ni namnama
ngem kas tay kellaat nga simmangbayka manen
kellaatka met laeng nga iti biagko naungaw
immayen tay luganmo limmuganka metten
kasla kimat, apagripat, naawanka manen
damagek man ngarud no sika nga agpayso
tay immay nangabay kaniak itay laeng,
itay laeng a nangiburay apagkanito, apagdillawit
a pannakapnek napalaus kenka nga iliwko
wenno paset laeng daytay ni naimnet a lagip
a mangisubli kenka no kua kaniak
tunggal ipalubos ti ngato nga tarayen ti tudo ti langit
dumagas dakulapko, inggana't daga danonenna
agpapan pay banag laeng ti panagdisso ti tudo
ti inna met panangbiag arasaas ni dungngo
unay metten apges nga ipalak-amna kaniak
ta sangit laengen ti langit ti mangsilpo iti angesko
